Ko e tau Iki mo e tau matua he matakau kau fakalataha he tau māgamotu mo e tau magafaoa oti i Niu Silani, katoa mo e tau Iki taki tokotaha ne nakai fai tohiaga ke he matakau kau fakalataha; kua talia auloa e lautolu mo e tau loto kau fakalataha, ke tuku atu ke he lilifu he Patuiki Fifine a Peritania lahi, mo e nakai fakauaua, e pule katoatoa ne ha ha i ai he matakau kau fakalataha he tau Iki he motu, mo e tau Iki taki toko taha. Kia ha ha i ai i lalo hifo he malolo mo e pule faka-patuiki, e tonuhia ke he levekiaga he tau fonua mo e tau mena oti ha ha i ai.

Ko e tau Iki mo e tau matua he matakau kau fakalataha mo e tau Iki oti ne nakai kau ai he matakau ia, kua tuku atu katoatoa e lautolu ke he Patuiki Fifine a Peritania e malolo katoatoa faka fakatufono ke pule mo e puipui aki e tau fonua he lautolu, tukulagi.

Kua talia fiafia he lilifu he Patuiki Fifine a Peritania, mo e fakamau fakamailoga ai ke he tau Iki fakamaga faoa, mo e tau matakau oti a Niu Silani, Fakalataha mo e tau iki taki toko taha; ke pule a ia mo e leveki ai kehe tau fonua, tau maga vao, fakalataha mo e tau puhala takafaga ika, mo e tau mena oti ne pule mo e leveki ki ai a lautolu fakamua, ka kia tuku lele atu ke he levekiaga he pule faka Patuiki. Kua ha ha ia ia foki e tonuhia ke vehe vehe mo e tufatufa, po ke fakafua atu e tau fonua ia ki a lautolu kua tutonu hia ki ai, ke he palepale kua talia auloa ki ai a lautolu, kua fifili he Patuiki Fifine ke eke mo tau hukui hāna.

Kua talia fiafia he Patuiki Fifine a Peritania ke leoleo mo e puipui e tau iki oti, mo e tau matakau oti fakalataha mo e tau tagata oti a Niu Silani, ke he tau levekiaga faka Iki, he tau fonua, tau maaga, mo e ha lautolu a tau koloa. Ka e ha ha i ai foki ni ke he matakau he tau Iki mo e tau Iki taki toko taha, e tonuhia ke fakafua atu e tau fonua ke he Patuiki Fifine, ke he palepale kua talia fiafia ki ai e tagata haana e fonua, mo e tagata ne fakatau mai ai. (ko ia ne fakatau mai e fonua, kua late ke fifili mai he Patuiki ke hukui aki a ia).

Ko e fifiliaga tonu he Patuiki Fifine a Peritania ha nei kia fakailoa fakalau lahi atu ke he tau tagata motu oti i Niu Silani: Kua ha ha ia ia e pule mo e tonuhia faka Patuiki, ke leveki mo e puipui a lautolu ke he tau levekiaga oti he hāna a malolo; ti ko e mena ia, kua eke tuai a tau tagata Niu Silani, mo tau tagata kua nonofo ki lalo hifo he higoa lilifu he kautu Peritania.

Ko e matakupu ia kua talia ki ai hagaao ke he fakatufono he Patuiki Fifine, to leveki mo e puipui mau he Patuiki Fifine a Peritania e tau lalo tagata oti a Niu Silani mo e foaki age ma lautolu e tonuhia he he tau gahua mo e faka higoa ko e tau tagata he motu, ke fakatai atu ke he tau tagata i Peritania Lahi.

(signed)
William Hobson,
Lieutenant Governor.

(signed)
William Hobson,
Consul and Lieutenant-Governor.