Whakataunga Tiriti

Ko ēhea whenua ka whakamahia mō ngā whakataunga?

I te nuinga o te wā, ko ngā whenua o te Karauna anake ka whakamahia. Heoi anō, kotahi te wāhi kāore e whāia tēnei tikanga. Ina hokona atu e te Karauna ētahi momo whenua, ka tāpiria he kupu whakamahara ki te taitara e tuku ana i te whenua kia whakamahia mō ngā whakataunga i raro i te Tiriti. Ka pēnei te āhua kia mōhio ai te kaihoko tērā e whakamahia te whenua mō taua kaupapa.

Ina hoko atu te Karauna i ōna whenua tāwere, ka āta tirotiro anō ia mēnā ka whai pānga te Māori ki aua whenua i mua i te hokonga atu. I ētahi wā, ka tāpuia e te Karauna he "tahua whenua" mō roto i ngā whakataunga. Ko ngā whenua kāore e kōwhiria e ngā rōpū kerēme, ka tangohia i te tahua whenua ina tatū katoa ngā kerēme o taua takiwā.

Mō te wāhi ki ngā whenua kua rāhuitia hei kaupapa atawhai, ko te kaupapa-here ka whāia e te Karauna i roto i ngā whakataunga, kia tukua ngā rohenga whenua iti nei, ā, me whenua e noho taonga ana ki te Māori, taha hītori, taha tikanga ā-iwi, taha wairua.