Whakataunga Tiriti

He aha tēnei mea te whakataunga?

Ko te whakataunga te ara kua kitea e te Karauna hei rongoā i ngā takahanga o te Tiriti o Waitangi i roto i ngā tau. Koinei ngā wāhanga e mau mai ana ki te nuinga o ngā whakataunga:

1. he kupu whakapāha ki te rōpū nāna te take, mō ngā mahi takatakahi i te Tiriti;
2. he utu taha tauhokohoko mō aua mahi hē a te Karauna – he whenua, he moni anō te utu i te nuinga o ngā whakataunga;
3. he utu taha tikanga-ā-iwi, tērā pea ka uru mai ki tēnei ko te whakawātea i te ara ki ngā puna kai tūturu, ko te whakarite kia whai wāhi atu te rōpū kerēme ki ngā whakahaere o ngā wāhi tapu me ngā rawa kei ngā whenua o te Karauna, me te whakamanatanga o ngā ingoa wāhi tūturu;
4. te whakaaetanga o te rōpū kerēme e kī ana he tōkeke te whakataunga, ā, e kore a muri e hokia anō – e mea ana tēnei kua kore rātou e āhei ki te hoki atu anō ki taua kerēme i ngā rā kei te heke iho.

Ko ngā whakataunga e pā ana ki ngā take 'aro whakamuri' - ko te tikanga o tēnei kōrero i konei, ko ngā kerēme e pā ana ki ngā mahi a te Karauna i mua i te tau 1992 – kei ngā ringaringa o te Tari Whakatau Take e pā ana ki te Tiriti o Waitangi. Ka whakatauria e te Tumu Whakarae ko te 21 Mahuru 1992 te rā "aukati", kia taea ai te whakatairite ngā utu e utua ana ki tēnā, ki tēnā rōpū kerēme. Ko ngā take e pā ana ki ngā mahi, ngā hapa rānei o muri i te tau 1992, mehemea ka kitea e whai tikanga tonu ana, ka whiriwhiria ngātahitia ki te tari kāwanatanga e hāngai ana. Katoa ngā nawe mō ngā āhuatanga i pā i mua i te tau 1992, ka kapi i te whakataunga kotahi, mehemea e mōhiotia ana i te wā i takoto ai te kerēme, kāore rānei. 

Ka āta whakatakotoria ngā kōrero katoa mō tētahi whakataunga Tiriti ki te tīti whakataunga. I te nuinga o te wā ka whakamanahia e te Kāwanatanga he ture hei whakatatū i te whakataunga.